(PAOLO SANTOS)

INUSISA ng Kilusang Magbubukid ng Pilipinas (KMP) kung ano ang nangyari sa ₱3 bilyon cold storage program ng Department of Agriculture (DA) at humihiling ng agarang kasagutan at pananagutan hinggil sa Optimization and Resiliency In the Onion Industry Network (ORION) Project dahil ang pinakabagong patakaran umano sa pag-aangkat ng sibuyas ay inaasahang magdudulot ng kalituhan sa mga lokal na magsasaka.

Ayon sa KMP, “nakita na natin ito noon pa—bumaba ang presyo ng sibuyas at napilitang itapon ng mga magsasaka ang kanilang ani dahil sa sobrang supply kaya ngayo’y dapat sagutin ng gobyerno kung ano ang nangyari sa pangako ni Pangulong Ferdinand Marcos Jr. na magtayo ng mas maraming cold storage facility para sa mga magsasaka.”

Hinayag pa ng KMP sa kanilang press statement na “noong 2024, kinilala mismo ng Pangulo na ang sobrang supply ay nagpapababa ng mga presyo kaya nga nagmungkahi ito ng cold storage bilang solusyon.”

Binanggit pa umano ni Marcos Jr. ang solar power bilang isang paraan upang mabawasan ang mga gastusin sa pagpapatakbo ng mga storage facility, subalit kalaunan ay inanunsyo ni DA secretary Francisco Tiu Laurel na plano ng gobyerno na magtatag ng dalawang solar-powered cold storage facility sa Occidental Mindoro sa pagsapit ng 2025.

Gayunpaman, nahihirapan pa rin ang mga magsasaka sa buong bansa na ma-access ang wastong imbakan kaya’t patuloy ang malawakang pag-aaksaya ng sibuyas na nasisira dahil sa kakulangan ng storage para sa mga ito.

“Nasaan ang mga ipinangakong pasilidad na ito?” tanong ng mga kasaping miyembro ng KMP at iba pang mga grupo ng magsasaka.

Kaugnay nito, mariing tinuligsa ni KMP chairperson at Makabayan senatorial candidate Danilo Ramos ang polisiyang pinaiiral ng Kagawaran ng Agrikultura.

“Paulit ulit lamang ang pagkakamali ng pamahalaan. Pinapayagan nito ang mga pag-import para bahain ang merkado sa pinakamasamang posibleng panahon—kapag ang mga lokal na magsasaka ay nag-aani. Ito ay humahantong sa labis na supply, pagbagsak ng presyo at toneladang nasayang na sibuyas. Sa halip na tulungan kaming mga magsasaka, pinalala ng mga patakaran ng DA ang aming paghihirap,” pagdadalamhati ni Ramos.

Nabatid din mula sa KMP na noong 2024, bumaba ang presyo ng pulang sibuyas sa halagang ₱10 kada kilo sa mga pamilihan sa Dagupan City dahil sa sobrang supply. Bukod dito, napilitan din ang mga magsasaka sa Nueva Ecija na magtapon ng kanilang inaning sibuyas dahil umaapaw ang mga cold storage facility at mas gusto ng mga negosyante ang mga imported na produkto.

Ang matinding pagbaba ng presyo ay naiugnay sa maagang pag-aani at labis na pag-asa sa cold storage na nabigong patatagin ang merkado.

“Sa kabila ng mga aral mula sa krisis ng sibuyas noong 2022—kung saan ang kakulangan ng mga pasilidad sa pag-iimbak at hindi wastong paghawak ay humantong sa pagkawala ng 100,000 metrikong tonelada ng sibuyas—ang DA ay nagpapatuloy sa mga patakaran na nabigong protektahan ang mga lokal na magsasaka,” pagtuligsa pa ng chairman ng LMP.